Jodlerparty und Verabschiedung unserer Dirigentin Ursula Oegerli

Wangen, 20. Juli 2022/rr

Verabschedig vo öiser Dirigentin Ursula Oegerli

Liebi Ursula

Mer hei scho vor eme Johr vo Der vo Dim Rücktrett im 2022zgi vernoh,

Höt duet met em Astimme vo öisne Lieder Di 6jährigi Dirigente Karriere bim JK Olten auso erfougrich z’End jetz goh.

Mer luege chorz zrogg of Dini sehr erfougrichi Jodlerinne- ond Dirigente-Zit,

Am vergangene Mittwoch hesch Du mer gseit, Du gniessisch jetz die jodlerfreie Zit.

Im 2016 hesch Du s’musikalische Zepter vo öisem Jodlerklub öbernoh,

Ond am NWSJF z’Rothrist hei mer vo der Jury scho es guet übercho.

Mer hei witer intensiv güebt i der reformierte Chele z’Wangen,

Dank däm esch es am EJF z’Brig met em Wettlied «Früeligsgloube» met m’e «guet» erfougrich witergange.

Am Hundertjährige im 2018 hei mer onder Diner Leitig z’Trimbach met 8 Gaschtjodler brilliert,

Nochhär hesch Du sage-ond-schreibe 9 neui – ohni Jodlergsang-Erfahrig - erfougrich i JK Olten integriert,

Am NWSJF z’Mümliswil het d’Jury öise Vortrag vom Wettlied «Summertag» met me «guet» juriert,

So heim mer öis för’s EJF z’Basel im 2020 qualifiziert,

Ond das z’Mümliswil ou entsprechend zelebriert.

Wäge Corona esch es ned so wit cho,

Du hesch i der Pandemie-Zit aber ned öppe nocheglo.

Hesch öis Links för Stimmböudig ond Text zom lere lo zue cho,

Mer hei auso d’Vorusetzige gha, z’Stimmbänder ned in Rueh z’lo,

So hei mer denn met wenig Probe öise Jodlerobe 2021 erfougrich i Agreff gnoh.

Dank öisem «Guet» met em Wettlied «Im Wärde» hesch Du – onder gar ned eifache Umständ – am NWSJF 22 im Bad Zurzach met öis e wechtige Grundstei gleit,

Es lit jetz am nöie JK Gunzgen-Olten, dass mer de im 2023 ou si bereit!!

Liebi Ursula

Mer Jodlerinne ond Jodler danke Der för Di onermüedlech Isatz, Dis Chönne ond  Di grossi Gedoud,

Ond wönsche Der, dass Der die gueti Gsondheit no lang, lang blibt houd.

Met Dene Guetschine chasch Du s’Koche vergässe,

Chasch nämli met Dim liebe Reini is Restaurant go ässe.

Herzlichi Jodlergrüess
Im Name vo Dini Jodlerkolleginne ond -kollege